ដោយ៖វីរជន
ថ្នាក់ដឹកនាំជាន់ខ្ពស់គណបក្សសង្គ្រោះជាតិ លោក
អេង ឆៃអ៊ាង និងលោក យ៉ែម បុញ្ញាប្ញទ្ធិ ក្រោយជំនួបកំពូលជាមួយលោកប្រធាន សម រង្ស៊ី
និងលោកអនុប្រធាន កឹម សុខា នៅទីក្រុងម៉ា នីល ប្រទេសហ្វីលីពីន នៅថ្ងៃទី២២ វិច្ឆិកា
បាននាំយកលទ្ធផល និងគោលជំហររបស់គណបក្ស ជំរាបជូនដល់ មន្រ្តី សកម្មជនគណបក្ស
នៅខេត្តសៀមរាប និង ខេត្តកំពង់ធំ ។
ក្នុងឱកាសជួបសំណេះសំណាលជាមូយ មន្រ្តី សកម្មជន
គណបក្ស នៃខេត្តសៀមរាប និងខេត្តកំ ពង់ធំ លោក អេង ឆៃអ៊ាង និងលោក យ៉ែម
បុញ្ញប្ញទ្ធិ បានជំរាបជូនពីស្ថានការណ៏នយោបាយចុងក្រោយនៅកម្ពុជា
នៃការធ្វើទុកបុកម្នេញរបស់គណបក្សកាន់អំណាច មកលើគណបក្សសង្គ្រោះជាតិ
ដើម្បីជាការសំឡុត គំរាមកំហែង និងបំបែកបំបាក់ ដែលជានយោបាយវប្បធម៌ចាស់
នៃគណបក្សមួយនេះតែងតែធ្វើ ។
ក្នុងនោះថ្នាក់ដឹកនាំជាន់ខ្ពស់របស់គណបក្ស
ក៏បានជំរាបជូនពីការអន្ទងរបស់គណបក្សប្រជាជន ដើម្បីនាំគណបក្សសង្គ្រោះជាតិ
ចូលទន្ទាក់របស់ខ្លួន ក្នុងរឿងហិង្សាផងដែរ ដូចអ្វីដែលគេបានធ្វើ
នាពេលកន្លងមកថ្មីៗនេះ តែទោះជាយ៉ាងណា គណបក្សសង្គ្រោះជាតិ មិនចាញ់ល្បិចកល និង មិនដើរលើផ្លូវដែលគណបក្សប្រជាជន
បានរៀបចំទុកជាមុននោះឡើយ ។
ដូចគ្នានេះផងដែរ ថ្នាក់ដឹកនាំគណបក្សសង្គ្រោះជាតិ
ទាំងពីររូប ក៏បានជំរាបដល់មន្រ្តី ថ្នាក់ដឹកនាំ សកម្មជន គណបក្សសង្គ្រោះជាតិ
ខេត្តសៀមរាប និងខេត្តកំពង់ធំ ពីការគ្មានការបែកបាក់គ្នាណា មួយ រវាងថ្នាក់ដឹកនាំកំពូលរបស់គណបក្សសង្គ្រោះជាតិ
លោកប្រធាន សម រង្ស៊ី និងលោកអនុប្រធាន កឹម សុខា ឡើយ ដែលពេលនេះលោកទាំងពីរកំពុងពេញបំពេញបេសកកម្មការងារយ៉ាងមមាញឹក
ជាមួយអន្តរជាតិ ដើម្បីអោយមានការជួយអន្តរាគមន៏ ពីបណ្តាប្រទេសទាំងនោះ ក្នុងការជួយនាំមកនូវស្ថេរភាពនយោបាយ
ក្នុងប្រទេសអោយមានភាពល្អប្រសើរឡើងវិញ ពិសេសគឺការនាំយកលទ្ធិប្រជាធិបតេយ្យមកកម្ពុជា
ពិតប្រាកដ ដែលមិនមែនគ្រាន់តែជាការមាននៅលើក្រដាស់តែប៉ុណ្ណោះ ។
ដូចគ្នានេះ ថ្នាក់ដឹកនាំគណបក្សសង្គ្រោះជាតិ លោក
អេង ឆៃអ៊ាង និងលោក យ៉ែម បុញ្ញាប្ញទ្ធិ ក៏ បានជំរាបពីគោលជំហររបស់គណបក្ស នៅតែប្រកាន់ភ្ជាប់នូវវប្បធម៌សន្ទនា
អហិង្សា ដោយមិនយកខ្មែរណាម្នាក់ធ្វើជាសត្រូវ ក្នុងនាមឈាមជ័រ និងពូជខ្មែរតែមួយ ។
ដូចគ្នានេះ ចុងក្រោយថ្នាក់ដឹកនាំគណបក្ស
ក៏បានជំរាបជូន មន្រ្តី ថ្នាក់ដឹកនាំ សកម្មជន របស់ខេត្តសៀមរាប និងខេត្តកំពង់ធំ ពីការត្រៀមខ្លួនក្នុងជ្រើសរើសបេក្ខជន
សម្រាប់ការឈរឈ្មោះ បោះឆ្នោតជ្រើសរើសក្រុមប្រឹក្សា ឃុំ សង្កាត់
នៅឆ្នាំ២០១៧ខាងមុខ ដើម្បីឈានទៅទទួលបានជោគជ័យ នៅការបោះឆ្នោតជាតិ អាណត្តិទី៦ ឆ្នាំ២០១៨ផងដែរ
ព្រោះក្នុងដំណាក់កាលនេះ ប្រជាពលរដ្ឋគ្រប់បជ្ឈដ្ឋាន គាំទ្រគណបក្សសង្គ្រោះជាតិ
ដើម្បីចង់អោយមានការផ្លាស់ប្តូរនៅកម្ពុជា ក្រោមការដឹកនាំគណបក្សប្រជាជន
ជាង៣៦ឆ្នាំកន្លងមក ៕
No comments:
Post a Comment
yes