ការអប់រំប្រកបដោយគុណភាពនិងផ្សព្វផ្សាយយ៉ាងទូលំទូលាយនូវព័ត៌​មានពិត​ពីសង្គមជាជំហានទី១ដែលជំរុញឲ្យយុវជនក្លាយជាពលរដ្ឋសកម្មរឿង​អាយុជីវិត​ប្រទេសជាតិ

ដោយ៖ ទេព សស៊ីណា

ប្រធានគណៈកម្មការអប់រំ យុវជន ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា និងជាតំណាងរាស្រ្ដគណបក្សសង្រ្គោះជាតិ មណ្ឌលព្រៃវែង លោក យ៉ែម បុញ្ញឫទ្ធិ បញ្ជាក់ថា យុវ ជន គួរត្រៀមខ្លួនរៀបចំផែនការណ៏អនាគតរបស់ខ្លួន ប្រកបដោយគុណភាព ដើម្បីក្លាយពលរដ្ឋ​សកម្ម និងជាអ្នកបន្ដវេនដឹកនាំប្រទេសជាតិ។

ថ្លែងក្នុងកិច្ចសន្ទនារវាងយុវជន និងតំណាងគណបក្សនយោបាយ ក្រោមប្រធានបទ គុណភាព​អប់រំ និងភាពជាពលរដ្ឋសកម្មរបស់យុវជន កាលពីថ្ងៃទី២០ ខែកញ្ញា ឆ្នាំ២០១៥ លោក យ៉ែម បុញ្ញឫទ្ធិ មានប្រសាសន៍ថា យុវជននឹងក្លាយជាជនសកម្ម ដរាបណាពួកគេទទួលបានព័ត៌មាន​ពិត​ពីសង្គម ដោយផ្ដោតសំខាន់លើប្រព័ន្ធផ្សព្វផ្សាយឲ្យបានទូលំទូលាយ និងមានភាពត្រឹមត្រូវ រួមជាមួយនឹងការអប់រំប្រកបដោយគុណភាព ហើយរាល់ការបញ្ចេញមតិ និងសកម្មភាពទាំង​ឡាយ​របស់យុវជន ត្រូវបានលើកទឹកចិត្ត ឲ្យមានភាពសកម្ម ក្នុងក្របខ័ណ្ឌច្បាប់ និងមិនត្រូវ​បាន​រារាំង ដោយអំណាចអ្នកនយោបាយណាមួយឡើយ។

ពាក់ព័ន្ធនឹងកត្ដាអប់រំនេះ លោកបន្ដថា ប្រទេសកម្ពុជាដែលដឹកនាំរាជរដ្ឋាភិបាល​ដោយគណបក្ស​ប្រជាជន បានធ្វើកំណែទម្រង់ក្នុងនីតិកាលទី៥នេះ ប៉ុន្ដែបន្ទាប់ពីការធ្វើកំណែទម្រង់ភ្លាម ទើប​យើង​សង្កេតឃើញថា ប្រព័ន្ធអប់រំនៅកម្ពុជា នៅមានកម្រិតខ្សោយនៅឡើយ ពីព្រោះមានសិស្ស​ជាច្រើនម៉ឺននាក់ប្រលងធ្លាក់មធ្យមសិក្សាទុតិយភូមិ។

កត្តានេះសបញ្ជាក់ឲ្យឃើញថា ប្រព័ន្ធអប់រំ និងគុណភាពអប់រំនៅមានកម្រិត ហើយរាជរដ្ឋាភិ​បាល និងក្រសួងសាមី ត្រូវហ៊ានទទួលស្គាល់ការពិតទាំងអស់គ្នា ដើម្បីការកែប្រែ និងអភិវឌ្ឍន៍​វិស័យអប់រំនៅកម្ពុជា។ គុណភាពអប់រំ និងការផ្សព្វផ្សាយព័ត៌មានសង្គមគ្រប់ជ្រុងជ្រោយ ជា​ចល​ករ ជំរុញឲ្យយុវជនក្លាយជាពលរដ្ឋសកម្ម ។

ជុំវិញករណីនេះ លោក យ៉ែម បុញ្ញឫទ្ធិ បានសម្ដែងការសោកស្ដាយ ចំពោះអាជ្ញាធរកម្ពុជា ដោយ​សារកន្លងទៅថ្មីៗនេះ សមត្ថកិច្ចបានចាប់យុវជនការពារបរិស្ថាន ការពារធនធានធម្មជាតិ និង​សកម្មជនដីធ្លីជាដើម ដាក់ពន្ធនាគារ ដែលនេះបង្ហាញឲ្យកាន់តែច្បាស់ថា រាជរដ្ឋាភិបាលមិនបាន​លើកទឹកចិត្តដល់យុវជននោះទេ បែរទៅជាបំបាក់ស្មារតីយុវជនក្នុងការចូល​រួមសកម្មភាព​សង្គម​ទៅវិញ ហើយប្រសិនបើមានបញ្ហាមិនប្រក្រតីណាមួយ រាជរដ្ឋាភិបាលគួរតែចាត់វិធានអប់រំ​ណែ​នាំ ដើម្បីកែប្រែជាជាងចាប់ដាក់គុក ។

គួរបញ្ជាក់ថា គណបក្សសង្រ្គោះជាតិមានគោលនយោបាយច្បាស់លាស់ស្ដីពីការអប់រំ និងការ​វិនិ​យោគលើវិស័យអប់រំ រួមជាមួយមធ្យោបាយនានា ដើម្បីធានាគុណភាពអប់រំនៅកម្ពុជា និងជំរុញ​លើកទឹកចិត្តចំពោះយុវជនសកម្ម ដើម្បីចូលរួមក្នុងសង្គមប្រកបដោយសុភវិនិច្ឆ័យ និងក្លាយ​ខ្លួន​ជា​អ្នកបន្ដវេនដ៏មានសក្ដានុពលក្នុងការដឹកនាំប្រទេសជាតិ ៕