សូមស្វាគមន៏ការចូលមកកាន់គេហទំព័ររបស់យើងខ្ញុំ​!!!​Welcome to ckn-media.blogspot.com Website !!!​គេហទំព័រ ckn-media.blogspot.com ផ្តល់ព័ត៌មានពិតឥតលំអៀង រហ័សទាន់ចិត្ត ដែលលោកអ្នកជឿទុកចិត្ត / លោកអ្នកអាចទាក់ទងមកកាន់គេហទំព័ររបស់យើងខ្ញុំបានតាមរយៈ Email: cknkhmer@gmail.com សូមអរគុណ !!!

Wednesday, September 23, 2015

ប្រធាននាយករដ្ឋានសារៈមន្ទីរជាតិ ព្រួយបារម្ភពីបញ្ហាប្រឈមមុខ នឹងហានិភ័យខ្ពស់ ប្រសិនបើមានករណីអគ្គិភ័យ ឬទឹកជំនន់កើតឡើងនៅបរិវេនសារៈមន្ទីរជាតិ


ដោយ៖ ទេព សស៊ីណា

ប្រធាននាយកដ្ឋានសារៈមន្ទីរជាតិ លោក គង់ វីរៈ បានលើកឡើងពីកង្វល់ និងការព្រួយបារម្ភ​ទូ​ទៅរបស់ខ្លួន ចំពោះបញ្ហាប្រឈមនានា ដែលនាំឲ្យមានការខូចខាតដល់សម្បត្តិវប្បធម៌ វត្ថុបុ​រាណ ដោយសារពុកផួយនៃការលិចទឹកភ្លៀង បញ្ហាអគ្គិភ័យ បញ្ហាសត្វព្រាប យកសារៈមន្ទីរ​ជា​កន្លែង​ដេក​បង្កឲ្យប៉ះពាល់ដល់ កន្លែងផ្ទុកវត្ថុបុរាណមានទំហំតូច​គ្មានស្ដង់ដារ​ហើយគ្មានបំពាក់​កាមេរ៉ាសុវត្ថិភាព និងការបញ្ហាកង្វះបង្គន់អនាម័យជាដើម ដល់ប្រធានគណៈ​កម្មការទី៧នៃ​រដ្ឋស​ភា និងសហការី ។

ប្រធាននាយកដ្ឋានសារៈមន្ទីរជាតិ លោក គង់ វីរៈ បានលើកឡើងពីកង្វល់ និងការព្រួយបារម្ភពី​បញ្ហាប្រឈមរបស់សារៈមន្ទីជាតិដូចនេះ នៅថ្ងៃទី២២ ខែកញ្ញា ឆ្នាំ២០១៥ ក្នុងជំនួបជាមួយ​ប្រតិ​ភូគណៈកម្មការទី៧នៃរដ្ឋសភា ក្រោមការដឹកនាំរបស់ លោក យ៉ែម បុញ្ញឫទ្ធិ នៅសារៈមន្ទីរជាតិ។


ថ្លែងក្នុងកិច្ចពិភាក្សានេះ ប្រធានគណៈកម្មការអប់រំ យុវជន ធម្មការ កិច្ចការសាសនា វប្បធម៌ និង​ទេសចរណ៍ នៃរដ្ឋសភា និងជាអ្នកតំណារាស្រ្ដ គណបក្សសង្រ្គោះជាតិមណ្ឌលព្រៃវែង លោក យ៉ែម បុញ្ញឫទ្ធិ បានសម្ដែងការលើកទឹកចិត្ត និងសរសើរពីស្នាដៃនានា​របស់មន្រ្ដីបំរើការងារ​នៅ​សារៈមន្ទី ដែលបានខិតខំបំពេញការងារយ៉ាងសកម្ម ទោះបីសារៈមន្ទីរជាតិនេះ​មានជួបប្រទះ​បញ្ហា​ប្រ​ឈម​យ៉ាងខ្លាំង និងខ្វះធនធានក្ដី។

លោកបន្ដថា សារៈមន្ទីរជាឃ្លាំងនៃវប្បធម៌ជាតិ បើវប្បធម៌រលត់ ជាតិរលាយ ហេតុនេះគួរណាស់​តែ សារៈមន្ទីរជាតិ និងសារៈមន្ទីរនៅតាមបណ្ដាខេត្តត្រូវបានគាំពារ និងយកចិត្តទុកខ្ពស់​ពីក្រសួង​ស្ថាប័នពាក់ព័ន្ធ ជាក់ស្តែងសារៈមន្ទីរជាតិកំពុងប្រឈមមុខយ៉ាងខ្លាំងអំពី​ការបាត់បង់វត្ថុ​បុរាណ​ដែលជាអត្តសញ្ញាណជាតិខ្មែរ ប្រសិនបើមានអគ្គិភ័យកើតឡើង ព្រោះសារៈមន្ទីរគ្មានប្រព័ន្ធ​ការ​ពារអគ្គិភ័យ។

ជុំវិញករណីនេះលោក យ៉ែម បុញ្ញឫទ្ធិ បានឆ្លើយតបភ្លាមៗទៅប្រធាននាយករដ្ឋសារៈមន្ទីរ លោក គង់ វីរៈដែលលោកបានលើកឡើងពីការខ្វះខាតបង្គន់អនាម័យ ដែលជាបញ្ហាមួយក្នុងចំណោម​បញ្ហាប្រឈមនានា នៅក្នុងសារៈមន្ទីរជាតិ ថា គ្រប់ប្រទេសទាំងអស់គេតែងតែគិតគូរណាស់​ពី​ការ​បន្ទោបង់របស់ភ្ញៀវទេសចរណ៍ ហើយការសាងសង់នេះក៏មិនសូវចំណាយកញ្ចប់​ថវិកា​ច្រើន​ដូចជាការបំពាក់ប្រព័ន្ធការពារអគ្គិភ័យនោះដែរ ហើយម្យ៉ាងវិញទៀតបើ​យើងក្រលេកមើល​ពី​ចំ​ណូលប្រចាំឆ្នាំរបស់សារៈមន្ទីរ ចាប់ពីឆ្នាំ២០១២ ២០១៣ ២០១៤ មានការកើនឡើងពីមួយឆ្នាំ​ទៅ​មួយឆ្នាំ ដូចនេះ តើសារៈមន្ទីរអាចបែងចែកប្រាក់ចំណូលមួយភាគតូចណាមួយ​សម្រាប់សាងសង់​បង្គន់អនាម័យបានទេ។

ចំណែកឯបញ្ហាសារៈមន្ទីរមានលក្ខណៈតូចនោះ នៅពេលខាងមុខសាកលវិទ្យាល័យ​ភូមិន្ទវិចិត្រ​សិល្បៈ នឹងផ្លាស់ប្ដូរទីតាំងទៅជិតវត្តគៀនឃ្លាំង ហើយខាងក្រសួងវប្បធម៌នឹងអភិរក្ស​អគារ​ចាស់​ទុក ដូច្នេះប្រហែលជាសារៈមន្ទីរអាចមានផ្ទៃដីទូលាយជាងនេះ។ ឆ្លៀតក្នុងឱកាសនោះដែរ ប្រ​ធាន​គណៈកម្មការទី៧នៃរដ្ឋសភា លោក យ៉ែម បុញ្ញឫទ្ធិ បានបញ្ជាក់ទៅមន្រ្ដីបំរើ​ការនៅសារៈ​មន្ទីរ​ជាតិក្នុងអង្គប្រជុំថា បញ្ហាប្រឈមរបស់សារៈមន្ទីរជាតិនេះ លោកនឹងលើកឡើងនៅពេលជួប​ពិ​ភាក្សា​ការងារ ជាមួយរដ្ឋមន្រ្ដីក្រសួងវប្បធម៌ និងវិចិត្រសិល្បៈ លោកអ្នកស្រី ភឿង សក្ខណា ដើម្បី​ជំរុញក្នុងការរកដំណោះស្រាយ នាពេលខាងមុខឆាប់ៗនេះ។

គួរបញ្ជាក់ថា នៅថ្ងៃទី២២ ខែកញ្ញា ឆ្នាំ២០១៥ លោក យ៉ែម បុញ្ញឫទ្ធិ និងសហការី បានចំណាយ​ពេលមួយថ្ងៃពេញ ក្នុងការចុះបំពេញបេសកកម្មប្រមូលព័ត៌មាន និងសិក្សាស្រាវជ្រាវអំពី​បញ្ហា​នានាដែលកើតមានឡើងនៅសាកលវិទ្យាល័យភូមិន្ទវិចិត្រសិល្បៈ និងសារៈមន្ទីរជាតិ ដើម្បីលើក​យកបញ្ហាប្រឈមនោះ ទៅជម្រាប និងពិភាក្សាជាមួយរដ្ឋមន្រ្ដីក្រសួងវប្បធម៌ និងវិចិត្រសិល្បៈ លោកស្រី ភឿង សក្ខណា៕

No comments:

Post a Comment

yes