លោក កឹម សុខា និងតំណាងរាស្ត្រជាប់ឆ្នោតគណបក្សសង្គ្រោះជាតិ
ស្ថិតនៅមុខសាលាដំបូងរាជធានី (រូបថតពី៖ បណ្តាញសង្គម)
ថ្នាក់ដឹកនាំគណបក្សសង្គ្រោះជាតិ ជាពិសេសតំណាងរាស្ត្រជាប់ឆ្នោត និងសមាជិកព្រឹទ្ធសភារបស់គណបក្សសមរង្ស៊ីទាំងអស់ ចេញដំណើរទៅកាន់តុលាការរាជធានីភ្នំពេញ ដើម្បីទាមទារឲ្យមានការដោះលែងតំណាងរាស្ត្ររបស់ខ្លួន៥រូប ដែលកំពុងឡើងតុលាការនៅព្រឹកថ្ងៃពុធនេះ។
លោក កឹម សុខា ប្រធានស្តីទីគណបក្សសង្គ្រោះជាតិ ថ្លែងប្រាប់អ្នកសារព័ត៌មាន នៅមុននេះបន្តិចថា លោកដឹកនាំអ្នកតំណាងរាស្ត្រជាប់ឆ្នោតរបស់គណបក្សសង្គ្រោះជាតិ រួមទាំងព្រឹទ្ធសភាទាំង១១រូបរបស់គណបក្សសមរង្ស៊ី ដែលដឹកនាំដោយលោក គង់ គាំ ទៅឈរនៅខាងមុខសាលាដំបូងរាជធានីភ្នំពេញ ដើម្បីទាមទារឲ្យទម្លាក់ចោលបទចោទ និងដោះលែងតំណាងរាស្ត្រទាំង៥រូប ដែលកំពុងឡើងសវនាការនៅព្រឹកនេះ ព្រោះលោកចាត់ទុកថា វាជាអំពើខុសច្បាប់របស់រដ្ឋាភិបាលគណបក្សប្រជាជនកម្ពុជា។
លោក កឹម សុខា បញ្ជាក់ថាជាការពិតអ្នកតំណាងរាស្ត្រទាំង៥រូបនេះ មានអភ័យឯកសិទ្ធិសភារួចទៅហើយ លោកថាចុះហេតុអ្វីបានជាការចាប់ខ្លួនពួកគាត់ដោយមិនមានការដកអភ័យឯកសិទ្ធិសភាជាមុននោះ។
សូមជម្រាបថា អ្នកតំណាងរាស្ត្រ៥រូប ដែលបានចាប់ខ្លួននាំឡើងតុលាការនៅព្រឹកនេះ រួមមានលោកស្រី មូរ សុខហួ លោក មែន សុថាវរិន្ទ្រ លោក ហូរ វ៉ាន់ លោក កែវ ភីរម្យ និងលោក រៀល ខេមរិន្ទ្រ។ តំណាងរាស្ត្រទាំងនេះ រងបទចោទ ពីដើមបណ្តឹងជាជនរងគ្រោះករណីបង្កអំពើហិង្សា។
ករណីហិង្សាម្សិលមិញនេះ បានកើតឡើងនៅឯទីលានប្រជាធិបតេយ្យ ខណៈដែលអ្នកគាំទ្រគណបក្សសង្គ្រោះជាតិប្រហែល៤០០នាក់ បានប៉ះទង្គិចជាមួយនឹងឆ្មាំសន្តិសុខ របស់សាលារាជធានីភ្នំពេញ បណ្តាលឲ្យបាតុករសង្គ្រោះជាតិរបួស១៤នាក់ និងឆ្មាំសន្តិសុខ៣៩នាក់រងរបួស ហើយក្នុងនោះសន្តិសុខរបួសធ្ងន់៣នាក់៕
No comments:
Post a Comment
yes