លោក កឹម សុខា(ធ្វេង) និងលោក សម រង្ស៊ី កាលពីកន្លងទៅ(រូបថតVOD)
អនុប្រធានគណបក្សសង្គ្រោះជាតិ លោក កឹម សុខា បញ្ជាក់ជាថ្មីទៀតថា មេដឹកនាំគណបក្សសង្គ្រោះជាតិ គឺទិញមិនលក់ សម្លុតមិនខ្លាច បំបែកមិនបាន។
លោក កឹម សុខា បញ្ជាក់បែបនេះជាការឆ្លើយតបនឹងលោកនាយករដ្ឋមន្ត្រី ហ៊ុន សែន ដែលបានថ្លែងនៅព្រឹកថ្ងៃព្រហស្បតិ៍នេះ។ក្នុងពិធីចែកសញ្ញាបត្រដល់ដល់ និស្សិតនៅវិទ្យាស្ថានអប់រំ លោក ហ៊ុន សែន មានប្រសាសន៍ថា លោក បាននិយាយត្រូវគ្នាជាមួយលោក សម រង្ស៊ី ត្រង់ចំណុចថា ការបោះឆ្នោតឃុំសង្កាត់ត្រូវធ្វើឡើងនៅខែកុម្ភៈ ឆ្នាំ២០១៧ និងរដ្ឋសភានៅខែកុម្ភៈដដែលឆ្នាំ២០១៨។ លោកបញ្ជាក់ថា លោក សម រង្ស៊ី បានស្នើសុំពេលពិភាក្សាជាមួយអនុប្រធានគណបក្ស លោក កឹម សុខា តែលោកហ៊ុន សែន ស្នើថា លោកជាប្រធានហេតុអ្វីបានជាមិនអាចសម្រេច។ លោកស្នើឲ្យលោក សម រង្ស៊ី ប្រាប់ទៅលោក កឹម សុខា ថា «កុំឲ្យលោក កឹម សុខា រឹងពេក»។
លោក ហ៊ុន សែន បញ្ជាក់ថា ប្រសិនបើមិនមានការឯកភាពគ្នា ដែលនាំឲ្យរាំងស្ទះដល់ការចរចា នេះមិនមែនជាកំហុសរបស់លោក និងលោក សម រង្ស៊ី ទេ គឺកំហុសរបស់លោក កឹម សុខា។
លោក កឹម សុខា បានបង្ហោះនៅលើហ្វេសប៊ុកលោកថា ភាគីខ្មែរមានជម្លោះនយោបាយ ការចរចារ ការនិយាយគ្នា ជា
អត្ថបទទាក់ទង
រឿងដែលចៀសមិនរួច។ លោកបញ្ជាក់ថា«យើងមិនអាចមិនអង្គុយនិយាយជាមួយគ្នានោះទេ! តែសមរង្ស៊ី និងកឹម សុខា ចរចាជាមួយគណបក្សប្រជាជន ដោយឈរលើផលប្រយោជន៍ជាតិ និងយុត្ដិធម៌ជូនប្រជាពលរដ្ឋ»។
លោក កឹម សុខា បន្តថា«លោក ហ៊ុន សែន អាចសំឡុតអ្នកនយោបាយដទៃបាន តែលោក ហ៊ុន សែន មិនអាចសំឡុត ខ្ញុំ កឹម សុខា បានទេ។ លោក ហ៊ុន សែន អាចទិញអ្នកដទៃបាន តែលោក ហ៊ុន សែន មិនអាចទិញខ្ញុំ កឹម សុខា បានជាដាច់ខាត។ ខ្ញុំស្គាល់ល្បិចនយោបាយលោក ហ៊ុន សែន ច្បាស់គឺមានបី ទី១ លួងលោម ទី២ សំឡុត និងទី៣ទិញ»។
មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថា ការដែលនាយករដ្ឋមន្ត្រីយកខ្សែអាត់មកចាក់ជាសាធារណៈបែបនេះគឺ ចំណុចមួយដែលមិនត្រឹមត្រូវ ហើយមិនមានឆន្ទៈពិតប្រាកដក្នុងការដោះស្រាយបញ្ហាប្រទេសជាតិ។ លោកបញ្ជាក់ថា ការចាក់ផ្សាយនេះ គឺធ្វើឡើងក្នុងគោលបំណងបំបែកបំបាក់ថ្នាក់ដឹកនាំគណបក្សសង្គ្រោះជាតិ។ លោកបន្តថា នឹងមិនមានជំនួបកំពូលអ្វីទេ ប្រសិនបើការចរចាក្រៅផ្លូវការ នៅមិនទាន់បានព្រមព្រៀងដោយមានការឯកភាពពីលោក កឹម សុខា។
លោក កឹម សុខា កំពុងធ្វើទស្សនកិច្ចនៅក្រៅប្រទេស។ លោកនឹងត្រឡប់កម្ពុជាវិញ នៅក្រោយពិធីបុណ្យចូលឆ្នាំវិញ៕
No comments:
Post a Comment
yes