អ្នកគាំទ្រគណបក្សសង្គ្រោះជាតិ ចូលរួមបាតុកម្មនៅទីលានប្រជា
ធិបតេយ្យ នៅព្រឹកថ្ងៃ១៥ ធ្នូ ឆ្នាំ២០១៣
ចូលឆ្នាំថ្មីប្រពៃណីជាតិឆ្នាំនេះឆ្នាំមមី សង្ក្រាន្តចំថ្ងៃ ១៥កើត ថ្ងៃពេញបូរមី ១រោច និង ២រោច ខែចែត្រ ពុទ្ធសករាជ ២៥៥៨ ត្រូវនឹងថ្ងៃអង្គារ ទី១៤ ១៥ និង ១៦ ខែមេសា ឆ្នាំ២០១៤ ជាថ្ងៃដែលប្រជាពលរដ្ឋខ្មែរទូទាំងប្រទេសជួបជុំក្រុមគ្រួសារ ដើម្បីអំណរទេវតាឆ្នាំថ្មី។
ឆ្នាំថ្មីចូលមកក៏ពិតមែន ប៉ុន្តែព្រឹត្តិការណ៍នានាក្នុងឆ្នាំចាស់ បានដិតដាមក្នុងអារម្មណ៍ពលរដ្ឋខ្មែរនៅឡើយ។ រឿងរ៉ាវមួយចំនួនមិនទាន់ត្រូវបានអ្នកនយោបាយដោះស្រាយបញ្ចប់ ដើម្បីជាជំនូនឆ្នាំថ្មីជូនរាស្ត្រខ្មែរនោះទេ។
ក្នុងរយៈពេលមួយសប្ដាហ៍ទៀតនេះ ឆ្នាំម្សាញ់ នឹងក្លាយជាឆ្នាំចាស់។ ឆ្នាំនេះមានព្រឹត្តិការណ៍ស្វាគមន៍ដំបូងនោះ គឺសមាជ និងបាតុកម្មរបស់គណបក្សសង្គ្រោះជាតិ ដែលកើតចេញពីការច្របាច់បញ្ចូលគ្នារវាងគណបក្ស សម រង្ស៉ី និងគណបក្សសិទ្ធិមនុស្ស។ គណបក្សសង្គ្រោះជាតិ បង្កើតបានជាង ១ខែប៉ុណ្ណោះ អនុប្រធានគណបក្សលោក កឹម សុខា បានទាមទារឲ្យគណៈកម្មាធិការជាតិរៀបចំ ការបោះឆ្នោតកែទម្រង់ការបោះឆ្នោត និងទាមទារឲ្យលោក សម រង្ស៉ី បានចូលស្រុកវិញ បន្ទាប់ពីគេចខ្លួនអស់រយៈពេលជាង ៣ឆ្នាំ ក្នុងសំណុំរឿងដកតម្រុយបង្គោលព្រំដែន។ រដ្ឋាភិបាលមិនព្រមកែទម្រង់ការបោះឆ្នោតទេ ហើយព្រឹត្តិការណ៍មួយចំនួនបានដាក់សម្ពាធលើអនុប្រធានបក្សប្រឆាំង លោក កឹម សុខា ទៀតផង។
ព្រឹត្តិការណ៍ទាំងនោះរួមមាន៖ បាតុកម្មរបស់អតីតអ្នកទោសគុកទួលស្លែង លោក ជុំ ម៉ី ស្ត្រីម្នាក់ចេញមុខប្រកាសថា ជាស្រីកំណាន់របស់លោក កឹម សុខា និងការបង្កើតច្បាប់ដាក់ទោសអ្នកមិនទទួលស្គាល់របបខ្មែរក្រហមជាដើម។
ព្រឹត្តិការណ៍ឃោសនាបោះឆ្នោតអាណត្តិទី៥ ជាប្រវត្តិសាស្ត្របានចូលមកដល់ គំនាបពីបរទេសក៏កាន់តែបន្ថែមលើរដ្ឋាភិបាលក្នុងបំណងបើកផ្លូវឲ្យលោក សម រង្ស៉ី ចូលស្រុក។
រដ្ឋាភិបាលលោក ហ៊ុន សែន បានថ្វាយលិខិតព្រះមហាក្សត្រស្នើសូមព្រះរាជទានទោសជូនលោក សម រង្ស៉ី ដើម្បីឲ្យមេបក្សប្រឆាំងមានឱកាសត្រឡប់ចូលស្រុក ហើយភ្លាមៗនោះ សន្ទុះគាំទ្របក្សប្រឆាំងកាន់តែផុសផុលឡើង។
រដ្ឋាភិបាលលោក ហ៊ុន សែន បានថ្វាយលិខិតព្រះមហាក្សត្រស្នើសូមព្រះរាជទានទោសជូនលោក សម រង្ស៉ី ដើម្បីឲ្យមេបក្សប្រឆាំងមានឱកាសត្រឡប់ចូលស្រុក ហើយភ្លាមៗនោះ សន្ទុះគាំទ្របក្សប្រឆាំងកាន់តែផុសផុលឡើង។
មាត់ចាបមាត់ព្រាបប្រាប់ពីលទ្ធផលបោះឆ្នោត ក៏ជាព្រឹត្តិការណ៍មិនអាចភ្លេចបានដែរ។ មនុស្សម្នាជាច្រើននាក់ទូរស័ព្ទប្រាប់សាច់ញាតិថា បក្សប្រឆាំងឈ្នះឆ្នោត។ សភាពការណ៍នៅភ្នំពេញ ស្រាប់តែភាពតានតឹងដោយមានរថក្រោះកម្លាំងប្រដាប់អាវុធបានចល័តចូលក្រុង ខណៈដែលមីកញ្ចប់ សាំង និងអង្ករ បានឡើងថ្លៃកប់ពពកក្នុងរយៈពេលតែកន្លះម៉ោង។
ស្ថានីយទូរទស្សន៍ជាតិចាប់ផ្ដើមប្រកាសលទ្ធផលបោះឆ្នោតជាបណ្ដោះអាសន្ន និងប្រកាសដូរម៉ោងផ្សាយលទ្ធផលឆ្នោត។ រឿងមួយដែលអ្នកស្រុកផ្អើលពេញប្រទេសនោះ គឺលោក សម រង្ស៉ី ប្រកាសឈ្នះឆ្នោតតាមហ្វេសប៊ុក (Facebook)។
យ៉ាងណាក៏ដោយ លោក សម រង្ស៉ី ពន្យល់តាមរលកផ្សាយរបស់វិទ្យុអាស៊ីសេរីថា រឿងនេះជាជោគជ័យរបស់គណបក្សប្រឆាំងដែលមិនធ្លាប់មានក្នុងប្រវត្តិសាស្ត្រ ហើយទូរស័ព្ទរបស់លោកក៏ស្រាប់តែដាច់ពីរលកផ្សាយផ្ទាល់តែម្ដង។ ប្រហែល ៥នាទីក្រោយមក អ្នកនាំពាក្យរដ្ឋាភិបាល លោក ខៀវ កាញារីទ្ធ បានប្រកាសតាមហ្វេសប៊ុកថា គណបក្សប្រជាជន ៦៨អាសនៈ និងបក្សប្រឆាំង ៥៥អាសនៈ ហើយលទ្ធផលនេះគ្មានការកែប្រែ។ បន្ទាប់ពីនោះ សភាពការណ៍ទូទៅបានក្លាយជាធម្មតាវិញ។ លទ្ធផលឆ្នោតក៏ចេញជាហូរហែ និងត្រូវដូចនឹងការប្រកាសរបស់លោក ខៀវ កាញារីទ្ធ បេះបិទតែម្ដង។ បក្សសង្គ្រោះជាតិ បានធ្វើសមាជធ្វើយុទ្ធនាការការទូតរហូតធ្វើបាតុកម្មដើម្បីជំទាស់នឹងលទ្ធផលបោះឆ្នោត និងទាមទារឲ្យស៊ើបអង្កេតពីភាពមិនប្រក្រតីនៃការបោះឆ្នោត។
ក្នុងឆ្នាំម្សាញ់វស្សានេះ ភ្លៀងធ្លាក់ខ្លាំង បង្កទឹកជំនន់ជន់លិចភូមិឋានអ្នកស្រុកស្ទើរទូទាំងប្រទេស។ខុសស្រឡះពីឆ្នាំរោង ដែលទឹកតែងតែធំ បែរជាខ្សត់ទឹកនៅតំបន់ខ្លះជួបគ្រោះរាំងស្ងួត។ ទឹកជន់ខុសទំនាយបែបនេះ ក៏កើតឡើងស្របាលគ្នានឹងវិនាសកម្មព្រៃឈើនៅកម្ពុជាដែរ។ ទឹកជំនន់នេះ បានសម្លាប់មនុស្សជាង ១០០នាក់ និងធ្វើឲ្យអ្នកស្រុកជាង ១លាននាក់រងផលប៉ះពាល់។
ទន្ទឹមនឹងស្ថានភាពប្រកាសអាសន្នពីគ្រោះធម្មជាតិនេះ សប្បុរសជនស្ថាប័នមនុស្ស សង្គមស៊ីវិល អង្គភាពរដ្ឋ និងគណបក្សនយោបាយ បានចុះចែកអំណោយឲ្យពលរដ្ឋរងគ្រោះហូរហែជាប់គ្នារដឹក។
ភ័យនឹងទឹកលិចមិនទាន់បាត់ផង អ្នកនយោបាយក៏បន្ថែមភ្លើងមួយជាន់ទៀត។ គណបក្សប្រឆាំងធ្វើបាតុកម្មនៅថ្ងៃទី១៦ ខែកញ្ញា ឯបក្សកាន់អំណាចបានរឹតបន្តឹងសន្តិសុខ រហូតដល់ក្លាយជាអំពើហិង្សាប៉ះគ្នាមួយប្រាវនៅស្ពានអាកាសក្បាលថ្នល់។ ពលរដ្ឋគប់ដុំថ្មសមត្ថកិច្ចបាញ់កាំភ្លើងគ្រាប់ពិតសម្លាប់យុវជនម្នាក់ និងបង្កឲ្យមនុស្សជាច្រើននាក់រងរបួស។ ដើម្បីសម្រាលស្ថានការណ៍ លោក ហ៊ុន សែន និងលោក សម រង្ស៉ី ក៏សម្រេចចិត្តពិភាក្សាគ្នា ប៉ុន្តែសមិទ្ធផលដុំកំភួនមិនមាននៅពេលនោះឡើយ។
ថ្ងៃបើកកិច្ចប្រជុំសភាជាលើកដំបូងក៏ជាថ្ងៃបិទចំថ្ងៃបិណ្ឌ ៣ គឺ ៣រោច ខែភទ្របទ ត្រូវនឹងថ្ងៃ២៣ កញ្ញា អាជ្ញាធររដ្ឋាភិបាលបានដាក់ទ័ព ដាក់របាំងលួសបន្លាព័ទ្ធជិតជុំស្ទើរមួយចំហៀងក្រុងភ្នំពេញ។ ព្រះបរមរាជវាំង មាត់ទន្លេដែលធ្លាប់មានមនុស្សអ៊ូអរទៅកម្សាន្តទៅបន់ស្រន់ បានក្លាយជាទីស្ងាត់ជ្រងំ លាយឡំនឹងតំណក់ភ្លៀងធ្លាក់ស្រិចៗ ក្រោមក្រសែភ្នែកកងទ័ពកាន់អាវុធស្វ័យប្រវត្តិគ្រប់ដៃ។ មួយថ្ងៃក្រោយ លោក ហ៊ុន សែន ប្រកាសពីគោលនយោបាយកំណែទម្រង់បោសសំអាតអំពើបក្សពួកនិយមក្នុងក្រសួងនិមួយៗ ប៉ុន្តែកូនអ្នកធំក៏កាន់តំណែងធំក្នុងជួររដ្ឋាភិបាលដដែល។
ចុងវស្សាឆ្នាំនេះ ក៏ជាពេលដែលបក្សប្រឆាំងធ្វើបាតុកម្មដែរ។ បាតុកម្មរយៈពេល ៣អាទិត្យជាប់ៗគ្នា បានបង្រៀនក្មេងតូចៗឲ្យចេះពាក្យ "ហ៊ុន សែន អើយចុះចេញទៅ" ជំនួសពាក្យថា "ដូរៗ" ដែលបក្សប្រឆាំងបង្កើតអំឡុងពេលឃោសនាបោះឆ្នោត។ បន្ថែមពីនោះកម្មករ ក៏ផ្ទុះការតវ៉ាទាមទារដំឡើងប្រាក់ខែដំណាលគ្នាដែរ។
នៅចុងខែមិគសិរ ឆ្នាំម្សាញ់ ត្រូវនឹងខែធ្នូ ឆ្នាំ២០១៣ លោក ហ៊ុន សែន បានទៅបំពេញទស្សនកិច្ចនៅប្រទេសវៀតណាម ចំពេលបាតុកម្មបក្សប្រឆាំងមានអ្នកចូលរួមជិតកន្លះលាននាក់។ នាយករដ្ឋមន្ត្រីត្រឡប់ពីវៀតណាមវិញ ក៏មានកម្លាំងប្រដាប់អាវុធបង្ក្រាបកម្មកររោងចក្រ នៅកំបូលបាញ់សម្លាប់កម្មករតវ៉ានៅផ្លូវវ៉េងស្រេង និងចាប់ខ្លួនមនុស្សជាង ២០នាក់ យកទៅដាក់គុកមកទល់សព្វថ្ងៃ។ រួចក៏ចាត់ការបំបែកបាតុកម្មនៅទីលានប្រជាធិបតេយ្យថែមទៀត។ បំបែករួច រដ្ឋាភិបាលចេញបម្រាមមួយហាមមិនឲ្យមានការជួបជុំនៅទីលានប្រជាធិបតេយ្យឡើយ។
ហេតុការណ៍បាញ់សម្លាប់កម្មករនៅផ្លូវវ៉េងស្រេង និងបម្រាមហាមជួបជុំនៅទីលានប្រជាធិបតេយ្យ ក្លាយជាប្រធានបទមួយដែលទាក់ទាញមន្ត្រីទូត ប្រទេសកាន់លទ្ធិប្រជាធិបតេយ្យមួយចំនួនឲ្យមកបំពេញទស្សនកិច្ចនៅកម្ពុជា។ ក្នុងនោះមានមន្ត្រីជាន់ខ្ពស់ក្រសួងការបរទេសសហរដ្ឋអាមេរិក រដ្ឋមន្ត្រីក្រសួងការបរទេសអូស្ត្រាលី អនុរដ្ឋមន្ត្រីក្រសួងការបរទេសចក្រភពអង់គ្លេស ប្រតិភូសហគមន៍អឺរ៉ុប សុទ្ធតែយករឿងនេះជជែកជាមួយរដ្ឋាភិបាលកម្ពុជា។
នៅរយៈពេលមួយខែចុងក្រោយនេះ អ្នកនយោបាយនៃគណបក្សទាំងពីរបង្ហាញជំហរចង់ជជែកពិភាក្សាគ្នា ប៉ុន្តែគេមិនទាន់ដឹងថា ឆ្នាំមមីនេះនឹងនាំលាភសំណាងឲ្យពលរដ្ឋ ឬនាំអំណាចចែកគ្នាឲ្យអ្នកនយោបាយនោះទេ៕
No comments:
Post a Comment
yes