លោកសម រង្ស៊ីប្រធានគណបក្សសង្គ្រោះជាតិបានថ្លែងស្វាគមន៍លោកនាយករដ្ឋមន្ត្រី ហ៊ុន សែនដែលបានបញ្ជាអោយមានការចាក់ផ្សាយសំឡេងនៃកិច្ចសន្ទនារវាងលោក និងលោកសម រង្ស៊ី កាលពីថ្ងៃម្សិលមិញ នៅក្នុងពិធីចែកសញ្ញាបត្រជាសាធារណៈនៅព្រឹកថ្ងៃព្រហស្បតិ៍នេះ។ «ខ្ញុំក៏ចង់អោយមានការផ្សព្វផ្សាយទូលំទូលាយដែរ។ យកទៅចាក់ផ្សាយនៅទីណាក៏បាន តាមទូរទស្សន៍ក៏បាន។ ប៉ុន្តែត្រូវចាក់ទាំងអស់។ គណបក្សសង្គ្រោះជាតិគ្មានអាថ៌កំបាំងទេ»។ នេះជាការបញ្ជាក់របស់លោកសម រង្ស៊ី។
បើទោះជាលោកសម រង្ស៊ីអះអាង លោកមិនបារម្ភអំពីការចាក់ផ្សាយខ្លឹមសារនៃកិច្ចសន្ទនាតាមខ្សែទូរសព្ទ ជាមួយលោកនាយករដ្ឋមន្ត្រីហ៊ុន សែននោះក៏ដោយ ប្រធានគណបក្សប្រឆាំងបញ្ជាក់ថា លោកក៏មិនបានដឹងមុនថា លោកនាយករដ្ឋមន្ត្រីហ៊ុន សែននឹងចាក់ផ្សាយកិច្ចសន្ទនានោះទេ។
តើការចាក់ផ្សាយកិច្ចសន្ទនារវាងមេដឹកនាំគណបក្សជាប់ឆ្នោតទាំងពីរជា សាធារណៈជាការបិទបញ្ចប់ទំនាស់នយោបាយ ឬដោយសារគ្មានដំណោះស្រាយ ខណៈសេចក្តីរាយការណ៍នានាបានផ្សាយថា លោកសម រង្ស៊ីត្រូវពិភាក្សាជាមួយលោកកឹម សុខាដែលជាអនុប្រធានគណបក្សសង្គ្រោះជាតិ ក្រោយពីបានជួបជាមួយលោកនាយករដ្ឋមន្ត្រីហ៊ុន សែន។ ហើយថាការនាំយកព័ត៌មានពីជំហររបស់គណបក្សប្រជាជនកម្ពុជាទៅពិភាក្សា ជាមួយលោកកឹម សុខានេះ ក៏ត្រូវបានលោកសម រង្ស៊ីប្រាប់លោកនាយករដ្ឋមន្ត្រីហ៊ុន សែនដែរ។
ទាក់ទងនឹងការជជែកជាមួយលោកកឹម សុខា លោកសម រង្ស៊ីពន្យល់ប្រាប់គេហទំព័រថ្មីៗ យ៉ាងដូច្នេះ៖«ខ្ញុំបានប្រាប់គាត់ (លោកហ៊ុន សែន) ថាខ្ញុំជាចង់ស្តាប់ ចង់បានព័ត៌មានពិត និងជំហររបស់គណបក្សប្រជាជនកម្ពុជា។ ខ្ញុំមិនអាចសម្រេចអ្វីបានទេ បើជាខ្ញុំជាប្រធានគណបក្សក៏ដោយ។ គណបក្សសង្គ្រោះជាតិ ជាគណបក្សប្រជាធិបតេយ្យ មានវិន័យផ្ទៃក្នុង។ ខ្ញុំជាអ្នកយកព័ត៌មាន ហើយខ្ញុំនឹងយកមកពិភាក្សាជាមួយឯកឧត្តមកឹម សុខា»។
គួររម្លឹកថា នៅថ្ងៃពុធម្សិលមិញ លោកសម រង្ស៊ី ប្រធានគណបក្សសង្គ្រោះជាតិបានទូរសព្ទពិភាក្សាជាមួយលោកស ខេង និងបន្ទាប់មកពិភាក្សាជាមួយលោកហ៊ុន សែនរយៈពេល៤៥នាទី ក្នុងគោលបំណងស្វែងរកការពិភាក្សាបញ្ចប់ទំនាស់នយោបាយទាក់ទងនឹងការ កែទម្រង់ការបោះឆ្នោត។ មន្ត្រីជាន់ខ្ពស់គណបក្សសង្គ្រោះជាតិ គឺ លោកអេង ឆៃអ៊ាង ដែលបានមានវត្តមាននៅពេលដែលលោកសម រង្ស៊ីកំពុងពិភាក្សាជាមួយលោកហ៊ុន សែននោះ បានប្រាប់អ្នកសារព័ត៌មានអោយដឹងថា មេដឹកនាំទាំងពីរបានជជែកអំពីបញ្ហាធំ៣។ ទី១គឺកាលបរិច្ឆេទនៃការបោះឆ្នោត ទី២ការកែទម្រង់គជប និងទី៣ គឺបញ្ហាប្រព័ន្ធផ្សព្វផ្សាយ។
លោកអេង ឆៃអ៊ាងបានបញ្ជាក់ប្រាប់គេហទំព័រថ្មីៗថា មេដឹកនាំទាំងពីរបានពិភាក្សាអំពីកាលបរិច្ឆេទនៃការបោះឆ្នោតជ្រើសរើស ឃុំប្រឹក្សាឃុំសង្កាត់ក្នុងខែកុម្ភៈឆ្នាំ២០១៧ និងការបោះឆ្នោតជ្រើសតាំងតំណាងរាស្ត្រក្នុងខែកុម្ភៈឆ្នាំ២០១៨។ ប៉ុន្តែមេដឹកនាំទាំងពីរមិនទាន់បានសម្រេចយ៉ាងណានៅឡើយទេ៕
No comments:
Post a Comment
yes