គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល បានចេញរបាយការណ៍មួយបញ្ជាក់ថា ស្ថានភាពនយោបាយនៅកម្ពុជានៅក្នុងឆ្នាំ២០១៣នេះ មានការធ្លាក់ចុះជាងឆ្នាំចាស់ បន្ទាប់ពីមានការប្រើហិង្សា និងការបំបិទសិទ្ធិសេរីភាពមួយចំនួនលើពលរដ្ឋ ក្រោយពីការបោះឆ្នោតថ្ងៃ២៨កក្កដា ឆ្នាំ២០១៣។
របាយការណ៍ប្រចាំឆ្នាំ២០១៣ របស់ខុមហ្វ្រែល ស្តីពីប្រជាធិបតេយ្យ ការបោះឆ្នោត និងការកែទម្រង់នៅកម្ពុជា ដែលចេញនៅថ្ងៃទី០៧ ខែមេសានេះ បញ្ជាក់ថា ស្ថានភាពនយោបាយនៅកម្ពុជាក្រោយការបោះឆ្នោតអាណត្តិទី៥នេះ មានការធាក់ថយក្រោយ បើប្រៀបធៀបនឹងអាណត្តិមុនៗ ដោយសារតែឃើញមានការប្រើហិង្សា និងបំបិទសិទ្ធិសេរីភាពនៃការជួបជុំ និងការធ្វើបាតុកម្មដោយសន្តិវិធីរបស់ពលរដ្ឋ។
របាយការណ៍ដដែលបន្តថា ចាប់តាំងពីការបោះឆ្នោតឆ្នាំ១៩៩៣ រហូតមកដល់បច្ចុប្បន្ន ទើបតែនៅអាណត្តិទី៥នេះ មានការកើតឡើងនូវអំពើហិង្សា និងការបិទសិទ្ធិសេរីភាពពលរដ្ឋក្នុងការប្រមូលផ្តុំ។
របាយការណ៍ បន្តទៀតថា សភាអាណត្តិថ្មីនេះ បានបង្កើតឡើងដោយឯកបក្ស ជាហេតុធ្វើឲ្យការអនុវត្តច្បាប់មិនត្រឹមត្រូវ និងផ្ទុយនឹងច្បាប់ជាតិ និងអន្តរជាតិ ដែលតម្រូវឱ្យមានការអនុលោមតាមច្បាប់លទ្ធិប្រជាធិបតេយ្យ ក្នុងរដ្ឋធម្មនុញ្ញឆ្នាំ ១៩៩៣ របស់កម្ពុជា។
នាយកប្រតិបត្តិនៃអង្គការខុមហ្វ្រែល លោក គល់ បញ្ញា មានប្រសាសន៍បន្ថែមលើរបាយការណ៍ ដោយជំរុញឲ្យរដ្ឋាភិបាល ក៏ដូចជាស្ថាប័នពាក់ព័ន្ធត្រូវធ្វើការកែទម្រង់លើការបោះឆ្នោត និងត្រូវពង្រឹងការអនុវត្តច្បាប់ឲ្យមានភាពត្រឹមត្រូវ ដើម្បីដោះស្រាយទំនាស់នយោបាយនេះ ឲ្យបានប្រសើរឡើងវិញ «ដែលពីមុខមកវាអត់មាន ឥឡូវនេះមានការបង្ក្រាប ការបិទមិនមានដំណើរការសេរីភាព លើសពី១០នាក់ ដែលវាមានការខុសច្បាប់ អ៊ីចឹងបានន័យថារដ្ឋាភិបាល អាជ្ញាធរមិនបានអនុវត្ត តាមច្បាប់ បើយើងធៀបពីមុនអត់មានទេ ដែលយើងឃើញបច្ចុប្បន្នគួរឲ្យព្រួយបារម្ភ ដែលមិនឲ្យមានសេរីភាពក្នុងការធ្វើការប្រមូលផ្តុំ បាតុកម្មដោយសន្តិវិធី ជាពិសេសរដ្ឋសភាតែម្តង គឺឯកបក្ស ដែលពីមុនមកយ៉ាងហោចណាស់ក៏មាន បក្សផ្សេងៗនៅក្នុងរដ្ឋសភា»។
ពាក់ព័ន្ធនឹងរបាយការណ៍នេះ អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន យល់ថា ការលើកឡើងរបស់ខុមហ្វ្រែល គ្រាន់តែជារបកគំហើញរបស់អង្គការនេះប៉ុណ្ណោះ។ លោកថា រដ្ឋាភិបាលបានវាយតម្លៃខ្ពស់លើស្ថានភាពនយោបាយនៅកម្ពុជា ដោយគោរពទៅតាមច្បាប់រដ្ឋធម្មនុញ្ញក្នុងការដឹកនាំប្រទេស «ហើយបរិបទថា ធាក់ថយពី លទ្ធិប្រជាធិបតេយ្យ ខ្ញុំមិនដឹងថាគេយកកន្លែងណាជាមូលដ្ឋាន នៃបន្ទាត់គ្រឹះក្នុងការវាយតម្លៃនោះទេ ពីព្រោះយើងជាប្រជាជាតិកំពុងតែរៀនសូត្រ កំពុងតែធ្វើយ៉ាងដូចម្តេច ដើម្បីឲ្យមានភាពសុខដុមរមនាជាមួយគ្នា។ ដូច្នេះ អ្នកដែលសុបិន្តឃើញខ្មែរឲ្យទៅដូចជាអាមេរិក ឬអ្នកសុបិន្តថា អាមេរិកឲ្យដូចជាខ្មែរ ជាការគិតមួយខុសដោយគ្មានការពិចារណាត្រឹមត្រូវ»។
កាលពីថ្ងៃទី០៨ខែមេសា ម្សិលមិញនេះ មជ្ឈមណ្ឌលសិទ្ធិមនុស្សកម្ពុជា (CCHR) ក៏បានចេញកំណត់សង្ខេបមួយ ដោយបង្ហាញថា សេរីភាពខាងការជួបប្រជុំ កំពុងតែត្រូវបានព្យួរ នៅប្រទេសកម្ពុជា នៅក្នុងបរិបទនៃការជាប់គាំងនយោបាយ ដែលកំពុងតែកើតមានបន្ត ចាប់តាំងពីការបោះឆ្នោតជ្រើសរើសតាំងតំណាងរាស្ត្រនៅ ខែកក្កដា ឆ្នាំ២០១៣ ខណៈគណបក្សសង្គ្រោះជាតិ បានពហិកាចូលរដ្ឋសភា ដោយទាញហេតុផលថា ការបោះឆ្នោតមានភាពមិនប្រក្រតីច្រើន ហើយបានធ្វើបាតុកម្មជាប្រចាំ៕
No comments:
Post a Comment
yes