លោក សម រង្ស៊ី ប្រធានគណបក្សសង្គ្រោះជាតិដែលកំពុងស្ថិតនៅក្នុងប្រទេសបារាំងបានមានប្រសាសន៍កាលពីថ្ងៃចន្ទ ទី២៤ ខែធ្នូ ថាលោកជឿជាក់ថានឹងមានការដោះស្រាយនៅនាទីចុងក្រោយសម្រាប់រូបលោកវិលត្រឡប់ចូលស្រុកវិញ។ លោក សម រង្ស៊ី ដែលជាមេដឹកនាំគណបក្សប្រឆាំងដ៏ល្បីល្បាញក្នុងប្រទេស កម្ពុជាបានបញ្ជាក់ថាលោកត្រូវតែមានឱកាសវិលត្រឡប់ចូលប្រទេសកម្ពុជាវិញ ដើម្បីចូលរួមក្នុងការបោះឆ្នោតជាតិឆ្នាំ២០១៣ខាងមុខហើយសម្ពាធពីសហគមន៍អន្តរជាតិលើរដ្ឋាភិបាល លោក ហ៊ុន សែន គឺជាដំណោះ ស្រាយដ៏សំខាន់បំផុត។ ជាមួយគ្នានេះក្រុមមន្ត្រីសង្គមស៊ីវិលដែលឃ្លាំមើលការបោះឆ្នោតក្នុងប្រទេសកម្ពុជាបានលើកឡើងថា ការបោះឆ្នោតជាតិអាណត្តិទី ៥ ថ្ងៃទី ២៨ ខែកក្កដា ឆ្នាំ២០១៣ខាងមុខមិនអាចអវត្តមានលោកសម រង្ស៊ី ដែលជាប្រធានគណបក្សសង្គ្រោះជាតិដ៏ល្បីល្បាញបានឡើយ។
លោកសម រង្ស៊ី បានរស់នៅក្នុង ភាពនិរទេសតាំងពីចុងឆ្នាំ២០០៩ បន្ទាប់ពីតុលាការក្រោមឥទ្ធិពល រដ្ឋាភិបាលដឹកនាំដោយនាយករដ្ឋមន្ត្រី ហ៊ុន សែន ចោទប្រកាន់និងកាត់ទោសលោកក្នុងសំណុំរឿងដកតម្រុយបង្គោលព្រំដែន ព្រមទាំងសំណុំរឿងក្លែងឯកសារសាធារណៈ និងផ្សាយព័ត៌មានមិនពិត។ កាលពីខែវិច្ឆិកា ឆ្នាំ២០១២ គណៈកម្មាធិការជាតិរៀបចំការបោះឆ្នោត (គ.ជ.ប) ដែលមានលោក អឹុុម សួស្តី ជាប្រធាន និងលោក ទេព នីថា អគ្គលេខាធិការបានសម្រេចលុបឈ្មោះលោក សម រង្ស៊ីចេញពីបញ្ជីឈ្មោះអ្នកបោះឆ្នោត ដើម្បីរារាំងកុំឱ្យលោកសម រង្ស៊ីអាច ចូលរួមបោះឆ្នោតបាន។ ទង្វើរបស់ គ.ជ.ប ត្រូវបានមជ្ឈដ្ឋាននានារិះគន់ថា ធ្វើឡើងដើម្បីបម្រើផលប្រយោជន៍គណបក្សកាន់អំណាចដោយគ្មានសេចក្តីអៀនខ្មាសព្រោះ គ.ជ.ប មិនលុបឈ្មោះជនជាតិយួន ចេញពីបញ្ជីបោះឆ្នោត ហើយបែរ ជាលុបឈ្មោះលោកសម រង្ស៊ី ប្រធានគណបក្សសង្គ្រោះជាតិដែលមហាជនស្គាល់ច្បាស់ទៅវិញ។
លោក សម រង្ស៊ី បានលាឈប់ពីតំណែងជាប្រធានគណបក្សសម រង្ស៊ី ហើយទទួលយកតំណែងជាប្រធានគណបក្សសង្គ្រោះជាតិដើម្បី ចូលរួមក្នុងការបោះឆ្នោតជាតិឆ្នាំ២០១៣ខាងមុខ ហើយគណបក្សសង្គ្រោះជាតិកំពុងតែក្លាយទៅជាគូប្រជែងយ៉ាងខ្លាំងក្លាជាមួយគណបក្សប្រជាជនរបស់លោក ហ៊ុន សែន។ គណបក្សសង្គ្រោះជាតិដែលជាការរួមកម្លាំងគ្នារវាងគណបក្សសមរង្ស៊ី និងគណបក្សសិទ្ធិមនុស្សមានគោលដៅបញ្ចប់ការដឹកនាំរបស់គណបក្សប្រជាជន ដែលគ្រប់គ្រងអំណាចអស់រយៈពេលជាង៣០ឆ្នាំមកហើយ។ ទាក់ ទងនឹងបញ្ហានេះក្រុមវិភាគនយោបាយមួយចំនួនបានវាយតម្លៃថាគណបក្សសង្គ្រោះជាតិកំពុងតែក្លាយទៅជាជម្រើសសម្រាប់ប្រជាពលរដ្ឋដែលមានឆន្ទៈផ្លាស់ប្តូរមេដឹកនាំនៅឆ្នាំ ២០១៣ ខាងមុខហើយប្រសិនបើការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌គឺគណបក្សសង្គ្រោះជាតិជាអ្នកទទួលបានជ័យជំនះលើគណបក្សប្រជាជនជាមិនខាន។
លោក សម រង្ស៊ី ដែលកំពុងបំពេញបេសកកម្មស្វែងរកការគាំទ្រពីសហគមន៍អន្តរជាតិ និងពីជនរួមជាតិខ្មែរនៅក្រៅប្រទេសបានមានប្រសាសន៍ថាលោកទទួលបានការគាំទ្រពីព្រឹទ្ធសភាហ្វីលីពីន ព្រឹទ្ធសភាអូស្ត្រាលី ព្រឹទ្ធសភាអឺរ៉ុប ក៏ដូចជាសមាជិកព្រឹទ្ធសភា និងសមាជិកសភាអាមេរិកក្នុងការគាំទ្រឱ្យរូបលោកមានវត្តមាននៅក្នុងការបោះឆ្នោតឆ្នាំ២០១៣។ លោក សម រង្ស៊ី មានប្រសាសន៍ទៀតថា សម្ពាធពីសហគមន៍អន្តរជាតិគឺជាដំណោះស្រាយតែមួយគត់ដែលអាចជួយរូបលោកវិលត្រឡប់ចូលស្រុកវិញបាន ប្រកបដោយសុវត្ថិភាព។ លោក សម រង្ស៊ី បានគូសបញ្ជាក់ថា "ខ្ញុំគិតថាអ្វីដែលសំខាន់ គឺការគាបសង្កត់មកលើជនផ្តាច់ការ ក្នុងប្រទេសកម្ពុជាសព្វថ្ងៃដូច្នេះខ្ញុំនៅតែជឿជាក់ដូចមុនៗ យើងឃើញ ហើយថា នៅពេលមានសម្ពាធអន្តរ ជាតិខ្លាំង គឺគេបញ្ចប់ដោយបន្ទន់ជំហរឱ្យមានដំណោះស្រាយនយោបាយនៅក្នុងប្រទេសកម្ពុជា"។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល ក៏រំពឹងដែរថា លោក សម រង្ស៊ី នៅមានឱកាសក្នុងការវិលត្រឡប់មកចូលរួមក្នុងការបោះឆ្នោតដ៏សំខាន់នៅថ្ងៃទី២៨ ខែកក្កដា ឆ្នាំ២០១៣ ខាងមុខ។ លោក គល់ បញ្ញា បានបញ្ជាក់ថា ច្រកសម្រាប់ដំណោះស្រាយមានច្រើនគឺច្រកសហគមន៍អន្តរជាតិ និងច្រកអ្នកនយោបាយក្នុងប្រទេសកម្ពុជាត្រូវជជែកគ្នាហើយប្រជាពលរដ្ឋចង់ឱ្យអ្នកនយោបាយខ្មែរជជែកគ្នាដើម្បីដោះស្រាយវិបត្តិនយោបាយ។ ជាមួយគ្នានេះក្រុមមន្ត្រីសង្គមស៊ីវិលនិងអ្នកតាមដានស្ថានការណ៍នយោបាយក្នុងប្រទេសកម្ពុជាចង់ឱ្យអ្នកនយោបាយទាំងនៅក្នុងជួររដ្ឋាភិបាល និងគណបក្សប្រឆាំងអង្គុយចុះដើម្បីជជែកគ្នាដោះស្រាយបញ្ហាជាតិសំខាន់ៗជាជាងការប្រឈមមុខដាក់គ្នាដើម្បីអំណាច។ ក្នុងនោះនាយករដ្ឋមន្ត្រី ហ៊ុន សែន និងក្រុមមេដឹកនាំ គណបក្សប្រជាជនត្រូវបន្ទន់ជំហរតាមអនុសាសន៍ របស់អង្គការសហប្រជាជាតិនិងសហគមន៍អន្តរជាតិដើម្បីចៀសវាងកុំឱ្យប្រឈមនឹងការរិះគន់ជុំទិសតទៅទៀត។
ក្រុមអ្នកសង្កេតការណ៍មួយចំនួនបានសម្តែងសេចក្តីព្រួយបារម្ភយ៉ាងខ្លាំងចំពោះការលុបឈ្មោះលោក សម រង្ស៊ី ចេញពីបញ្ជីឈ្មោះអ្នកបោះឆ្នោតព្រោះ ករណីនេះជារឿងនយោបាយសុទ្ធសាធ ហើយជាចេតនារបស់គណបក្សកាន់អំណាចក្នុងការរារាំងមិនឱ្យលោក សម រង្ស៊ី ចូលរួមប្រកួតប្រជែង។ ដូច្នេះអង្គការសហប្រជាជាតិ និងសហគមន៍អន្តរជាតិគួរតែពិនិត្យមើលឱ្យបានដិតដល់ចំពោះទង្វើរបស់គណបក្សកាន់អំណាចក្នុងការរារាំងលោក សម រង្ស៊ី មិនឱ្យចូលរួមបោះឆ្នោតព្រោះជាទង្វើដែលផ្ទុយពីគោលការណ៍ប្រជាធិបតេយ្យសេរីពហុបក្សយ៉ាងគឃ្លើន។ ជាពិសេសអង្គការសហប្រជាជាតិ និងសហគមន៍អន្តរជាតិ ត្រូវជំរុញឱ្យរដ្ឋាភិបាលលោក ហ៊ុន សែន កែទម្រង់ប្រព័ន្ធបោះឆ្នោតនិងផ្លាស់ប្តូរសមាសភាពគណៈកម្មាធិការជាតិរៀបចំការបោះឆ្នោតឱ្យ ខាងតែបាន បើមិនដូច្នេះទេការបោះឆ្នោតមិនអាចប្រព្រឹត្តទៅដោយសេរីត្រឹមត្រូវ និងយុត្តិធម៌បានឡើយ។ដោយហេតុថា គ.ជ.ប ដែលមានលោក អុឹម សួស្តី ជាប្រធាន និងលោក ទេព នីថា ជាអគ្គលេខាធិការគឺជាឧបករណ៍របស់គណបក្សកាន់អំណាចហើយធ្វើអ្វីៗដើម្បីបម្រើផលប្រយោជន៍របស់គណបក្សកាន់អំណាចដោយមិនខ្វល់ទៅនឹងការរិះគន់ពីសហគមន៍អន្តរជាតិឡើយ។
អ្នកតាមដានស្ថានការណ៍នយោបាយនិងបញ្ហាសង្គមនៅក្នុងប្រទេសកម្ពុជាបានកត់សម្គាល់ថាសកម្មភាពរបស់លោក សម រង្ស៊ី នៅលើឆាកអន្តរជាតិបានទទួលនូវការគាំទ្រពីសហគមន៍អន្តរជាតិ និងពីអង្គការសហប្រជាជាតិកាន់តែខ្លាំងឡើងៗដែលជាការជួយជ្រោមជ្រែងឱ្យលោកអាចវិលត្រឡប់មកប្រទេសកម្ពុជាវិញនាពេលឆាប់ខាងមុខ។ តាមរយៈសម្ពាធរបស់សហគមន៍អន្តរជាតិលើរដ្ឋាភិបាលកម្ពុជា គឺអាចធ្វើឱ្យរដ្ឋាភិបាលកម្ពុជាបើកច្រកឱ្យលោក សម រង្ស៊ី វិលចូលស្រុកវិញដើម្បីប្រកួតប្រជែងក្នុងការបោះឆ្នោតប្រកបដោយតម្លាភាព និងស្របទៅតាមឆន្ទៈប្រជាពលរដ្ឋ។ រដ្ឋាភិបាលលោក ហ៊ុន សែន មិនអាចច្រានចោលអនុសាសន៍របស់អង្គការសហប្រជាជាតិនិងសហគមន៍ អន្តរជាតិបានទេព្រោះចាប់តាំងពី ក្រោយពេលបោះឆ្នោតអាណត្តិទីពីរ ឆ្នាំ១៩៩៨ រួចមកកម្ពុជារស់បានដោយសារពឹងផ្អែកលើជំនួយនិងប្រាក់កម្ចីពីបរទេសរាប់ពាន់លានដុល្លារ ក្នុងមួយឆ្នាំៗ។ រដ្ឋាភិបាលកម្ពុជាមិនអាចអាងលើជំនួយនិងប្រាក់កម្ចីពីរដ្ឋាភិបាលចិន ហើយធ្វើមិនដឹងមិនឮចំពោះអនុសាសន៍របស់សហគមន៍អន្តរជាតិនោះទេ ព្រោះអាចធ្វើឱ្យប៉ះពាល់ដល់ផលប្រយោជន៍ជាតិ និងផលប្រយោជន៍របស់ប្រជាពលរដ្ឋ។
អ្នកសង្កេតការណ៍ជាតិ និងអន្តរជាតិបានលើកឡើងថាការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា ឆ្នាំ២០១៣ គឺជាការប្រកួតប្រជែងផ្តាច់ព្រ័ត្ររវាងគណបក្សប្រជាជនកម្ពុជារបស់លោកហ៊ុន សែន និងគណបក្សសង្គ្រោះជាតិ ដែលមានលោកសម រង្ស៊ី ជាប្រធាន។ បើពិនិត្យទៅលើស្ថានការណ៍ជាក់ស្តែងគណបក្សប្រជាជនកំពុងមានសេចក្តីព្រួយបារម្ភយ៉ាងខ្លាំងចំពោះសន្ទុះគាំទ្រគណបក្សសង្គ្រោះជាតិពីសំណាក់ប្រជាពលរដ្ឋខ្មែរទាំងក្នុងនិងក្រៅប្រទេស ព្រោះគណបក្សសង្គ្រោះជាតិមានគោលនយោបាយច្បាស់លាស់ក្នុងបញ្ហាបម្រើ និងការពារផលប្រយោជន៍ប្រជាពលរដ្ឋ។ដូច្នេះអង្គការសហប្រជាជាតិនិងសហគមន៍អន្តរជាតិត្រូវតែជួយជ្រោមជ្រែងធ្វើយ៉ាងណាឱ្យការបោះឆ្នោតជាតិអាណត្តិទី៥ ក្នុងប្រទេសកម្ពុជាដែលឈានមកដល់នៅថ្ងៃទី២៨ ខែកក្កដា ឆ្នាំ២០១៣ ប្រព្រឹត្តទៅដោយសេរី ត្រឹមត្រូវនិង យុត្តិធម៌ស្របតាមគោលការណ៍ប្រជាធិបតេយ្យនិងស្របតាមឆន្ទៈប្រជាពលរដ្ឋទូទៅដែលចង់ឱ្យមានការផ្លាស់ប្តូរមេដឹកនាំ៕
No comments:
Post a Comment
yes